Polarkveld på Ishavsmuseet fredag 11. oktober kl. 19.00. Vegar Brandal «I Nansens fotspor»

Vegar Brandal «I Nansens fotspor»

Vegar er oppvaksen i og bur i Ulsteinvik. Han er utdanna frå Norges Idrettshøgskule med blant anna friluftsutdanning. Vegar har guida nokre turar blant anna i Russland og Kirgistan, og på Grønland. Han har vore på tur med både Cecilie og Truls, og både bestefar og oldefar er legendariske ishavsskipperar. Gradvis har polarinteressa til Vegar også fått utvikle seg. Dette har mellom anna materialisert seg gjennom eigne ekspedisjonar. Fredag vil Vegar Brandal fortelje om si sjølvopplevde kryssing av Grønland – i foredraget ”I Nansens fotspor”.

Foredraget Vegar kjem til Brandal med, vil handle om kryssinga av Grønlandsisen frå vest til aust, og litt om førebuingane til dette. Ruta som dei brukte under turen våren 2011 ligg litt nord om den ruta som Fridtjof Nansen brukte i 1888. Føredraget er lagt opp med bilder og film.

Eit spanande foredrag som vi gler oss stort til å få ta del i.

Tøffing

Vegar Brandal er ein friskus. Han er glad i naturopplevingar, noko som speglar seg i ulike gjeremål og stunt han utfører på fritida. Ikkje berre trivst 43-åringen i fri og frisk luft; han har også erfaring med å guide andre eventyrlystne under krevande naturforhold.

Vegar Brandal er glad i polarhistorie, og gjennom å ha tileigna seg kunnskap om ulike polarheltar sine bragder, vaks det fram ei eventyrlyst om å få smake på polarnaturen, han også. Is og kulde skulle uansett ikkje vere det største problemet for ein fyr med etternamnet Brandal. Likevel må det seiast, ei kryssing av Grønlandsisen – uansett kva retning det skal vere – er det heller få som maktar å utfordre. Vegar sitt turfølgje (eller ekspedisjon) valde å krysse isen frå vest til aust. Vegar var ein av tre guidar; Cecilie Skog var ein av dei andre guidane. Til saman 12 betalande kundar var med på turen.

Publikum får høyre Brandal fortelje om planlegginga og utfordringane på turen. Den visuelle delen av foredraget – som er sett saman av snuttar av levande bilde og fotoseriar signert hovudpersonen sjølv – viser den spektakulære naturen. Både i solskin og i styggevér. Det var aldri lange pausane. I snitt gjekk laget 35 kilometer per dag.

– Ein kan sjå på det som monotont. Men vi gleda oss over nyansane i landskapet. Dagane då det var strålande sol og ikkje eit vindpust var sjølvsagt heilt ubeskrivelege. Men det var også godt å oppleve at gruppa funka då snøstormen rasa. Høgdepunktet var å sjå fjella den siste dagen. Det var heilt spesielt, seier Vegar Brandal.

Ishavsmuseet byr som vanleg på middagsservering under polarkvelden, og denne gong er det bacalao-buffet med kvit og raud bacalao på menyen. Denne gong vert det buffet frå kl. 17.00 til kl. 21.00.

Påmelding for middag. Billett foredrag og middag kr. 300,- kun foredrag kr. 100,- kun middagsbuffet kr. 225,-