Lance (II)

«Lance» er første gang på selfangst i 1948. Før dette dreiv den nokre år fiske og gjekk i rutefart på Finnmarkskysten etter krigen. «Lance» går to turar til Nordisen første året, og fangar til saman 1725 sel.

I 1949 fangar dei 1502 sel i Austisen, men får skade på propellen då skuta skulle assistere «Stenbakken». Skutene var då om lag 40 kvartmil vest av Kapp Kanin. Redningsskøytene «Astrid Finne» og «Storebrand» kom frå Vardø og slepte dei to havaristane dit. I 1958 må «Lance» igjen ha slep heim då botnramma brotna under gange i isen. Etter reperasjon i Vardø gjekk skuta tilbake til fangstfeltet og kom heim med 1408 sel.

I 1965 fraus «Lance» inne i Austisen. «Espenesvåg» og «Polis» låg også faste eit stykke unna. Isen dreiv med retning mot land, og situasjonen kunne fort bli farleg, og skipperane tok difor kontakt med Vardø for å be om hjelp. 8. april kjem det russiske bergingsfartyet «Capitan Afanasiev» fram til «Lance» og bauga den fri utan større problem. Så gjekk turen over til dei to andre. Alle tre skutene følgde bergingsbåten på veg ut av isen. Men det var vanskeleg å manøvrere i råka i det kraftige propellvatnet etter «Capitan Afanasiev». Det enda med at «Polis» og «Lance» tørna saman, og dei fekk noko skade.

I 1967 er tida over for «Lance», den vert kondemnert og senka i Grovfjord.