Sleipner

Som ny var skøyta brukt til makrellfiske og finnmarksfiske.

Saman med «Minna» og «Nils Liaaen» første skute frå Sunnmøre på selfangst i 1898. Meir om oppstarten av sunnmørsk selfangst her: https://www.ishavsmuseet.no/fortellingar/far-og-son-brandal-starta-selfangsten-fra-sunnmore/

Berga mannskapet på Mikal Landmarks «Norrøna» i 1901 då den forliste ved Grønlandskysten. I slutten av august kom Sleipner med Jonas Fuglevig til skipper inn til Ålesund frå Grønland med ein fangst av sel, 90 tønner spekk, 8 tønner med laks, 5 isbjørnar, 14 moskusoksar, 5 narrkval og 3 ulv.

Den unge eventyraren H.W. Sundt frå Oslo hadde betalt seg med «Minna» som turist på fangst i 1902. Dette gav meirsmak og i 1903 kjøper han «Sleipner» og rustar den ut for sportsjakt og fangst ved Grønland. Mannskapet denne første turen er stort sett frå Brandal. Fangsten denne første «eventyrturen» var 1100 sel og 4 levande og 37 døde isbjørn. Sundt var strålande fornøgd med første turen: «En meget god tur med udmærket god jakt. Sådanne Grønlandsfærder kan være noget for vore sportsmænd. Det er noget ganske andet end ved hjælp av en god hund at få livet af et par rypekyllinger så at sige udenfor stuedøren». Dei fleste isbjørnane hadde Sundt sjølv skote. Isforholda var vanskelege dette året, og dei brukte tre veker før dei kom inn til Grønland.

Forliste ved Biscayerhuken på Svalbard 3. juni 1926 etter isskruing. Etter ein hard månad i fangstbåt og diverse fangsthytter vart mannskapet teke opp av «Jan Mayen» og brakt til Ny-Ålesund. Dei får skyss heim til Noreg med ein lastebåt.